Iyo tugenda mu nzira, hari ibintu byinshi tudatekerezaho  cyane cyangwa se ngo bidfatire umwanya nyamara bikaba ari ngombwa cyane. Urugero rwa hafi, ni umwuka duhumeka. Twese tuzi ko uwo mwuka udahari no kubaho ntitwabaho. Ariko iyo tugenda ntitwibaza umwuka ukozwe n’iki, ntitwibaza aho uva n’uko utunganywa ngo utatubera uburozi n’ibindi nk’ibyo. Ariko se ni nde wari wawubona n’amaso ye? Urundi rugero nafata ni moteri y’imodoka (car engine). Iyo uri mu mudoka (utwaye cywangwa bagutwaye) ubona igenda ukabona ikata, iterera imanuka, ariko si kenshi umuntu atekereza ku biri kubera muri moteri yayo. Nyamara iyo moteri niyo ituma imodoka igenda. Ku buryo itariho, ntabwo yava aho iri!

Izi ngero nzitangiye iki? Nzitanze kubera ko ibyo tutabonesha amaso, ahanini nibyo bigenga ibyo tubona!  Mu rugero rw’umwuka duhumeka, n’ubwo ari imvange y’imyuka inyuranye, Oxygene ikaba imwe muri iyo myuka, ni kimwe mu bya ngombwa umubiri ugomba kugira byanze bikunze. Moteri y’imodoka nayo ni kimwe mu bikenewe ngo imodoka igende. Itarimo, wenda imodoka bayikurura ariko ntiyaba ikibaye imodoka.

Mu rugendo rwa gikristu ni kimwe. Reka mfate urugero rwa Pawulo…

Uyu mugabo yari umufarisayo, nabo bakaba bari abakuru b’idini ry’abayahudi bakomeye. Babaga barize ibyanditswe ndetse baraminuje. Pawulo nawe ni uko. Yari umunyabwenge nk’uko anabyirata ubwe. Mu gitabo cy’Abafilipi  3:4-6 asobanura neza uwo ariwe. Igihe kigeze ahura na Yesu mu nzira ijya i Damasiko ibya kiyahudi ahita abivamo atongeye kubitekerezaho kabiri. Abo bari kumwe icyo gihe, cyangwa se bakoranaga bagomba kuba barumiwe, noneho bikarenga kumirwa ahobwo bakagirango yasaze neza neza. Nkeka ko ubwo yatangiraga kubabwira iby’iyerekwa yagize ku manywa y’ihangu aho Yesu yamusanganga mu nzira agiye gutoteza itorero ry’Imana, bagomba kuba baragirango ahari yahanzweho! Kubera iki ? Kuko yari yabonye ibyo bo batabonye. Yari yabonye ibihishwe (benshi)!

Nyuma y’ibyo, ubuzima bwe busigaye yarwanye intambara urudaca, baramwanga, baramugambanira, baramufunga, baramukubita,… Ariko yari azi ko nyuma y’ibyo yabonye hari ibizabonwa n’abandi (umusaruro w’ibyo yizeye), yakomeje umutsi aranesha.  Itorero rya Kristo ubu rimaze kugira abantu amamiliyoni menshi cyane mu bihe byahise byose, kandi Paul yagize ruhare rukomeye cyane. Ibibonwa ubu (itorero) cyavuye mubyo abantu benshi icyo gihe batabonaga (ibyo Pawulo n’abandi bigishaga).

Mu buzima busanzwe bwa buri munsi, tugira ibitekerezo, imishinga (isanzwe cyangwa yo mu murimo w’Imana), ariko akenshi iyo tubisobanukiwe, abandi siko baba babisobanukiwe kimwe. Akenshi iyo umuntu ari gukora ibintu we yumva ariko abandi batumva, abantu bagirango yarasaze, yabuze ikindi akora,… Abashakashatsi benshi bagiye bateza isi imbere wasangaga baramaze amasaha menshi bari kwiga ikintu runaka ku buryo abantu wenda bagera aho batabumva (kuko batashoboye kubona ibitwabonwa). Amakompanyi akomeye yagiye ava mu bitekerezo abantu “basanzwe” batumvaga! Ariko igihe kigeze umusaruro uraboneka!

Mu kurangiza, ndagirango nibutse abasomyi bizera ko ibyo tubona biva mubyo tutabona. Hamwe dupfukamye dusenga Imana, hari abatazatwumva, hari abazagirango turi inkorabusa cyangwa se abanebwe. Hari abazatwita amazina anyuranye, kandi ni uburenganzira bwabo nabo barabikoze baba atari bazima. Tubikora kuko twasobanukiwe ko Imana (ibyo tutabona) ariyo igenga isi n’ibiyirimo (ibyo tubona). Ni uko rero ubutaha, mweneso naza iwawe akubwira ko afite umushinga cyangwa se igikorwa runaka ashaka gukora, aho kumucira urubanza cyangwa kumuca intege, uzamufashe gusenga no kujya inama, kuko n’aho wowe utabibona, wenda hari ibiboneka bizavamo mu minsi iri imbere. Iyo urebye umurimo w’itorero ubu ku isi yose, nta waketse ako ari ibyavuye mu bikobwa by’intumva zisuzuguritse z’icyo gihe hakaba hashize imyaka 2000 … !

Ikindi cyiza cya Podcast ni uko indirimbo n’ibiganiro byose bizajya bizaho ushobora kubishyira kuri computer yawe (Download/ Télécharger).

Injira muri Podcast ya ishimwe.

Ubayeufite ikibazo cyose, watwandikira ukatubaza.

Niba ufite indirimbo ushaka kugeza kubandi zitwoherereze hano.

Itegekonshinga ni urutonde rw’amabwiriza agenga imiyoborere, agasobanura inshingano n’imyitwarire mu buyobozi bw’igihugu runaka. Itegekonshinga rero nshaka ko tuvugaho uyu munsi si iry’u Burundi, cyangwa se Congo Democratique cyangwa se u Rwanda, cyangwa se ikindi gihugu, ahubwo ni itegekonshinga ryo mu ijuru. Impamvu nshaka ko turivugaho, ni uko maze iminsi mbona ibibazo binyuranye hano kuri ishimwe.com ndetse no kuri PraiseVoice.com ariko nsanze ari ibibazo bifite ishingiro kandi benshi bagenda bahuriraho.

Mu kuganira ku itegekonshinga rero, reka mbanze mvuge ku bintu bimwe biriranga (irya hano mu isi).

1. Rireba abantu bose ritataye kucyo umwe aryita. Ntabwo rihindurwa n’uko umuntu umwe ahisemo kurifata.
2. Riba ryanditse kugirango n’ibizahinduka bizabe bifite aho bibarizwa (reference) mu gihe habayeho impinduka.
3. Riba rifite ukuri kumwe (kureba icyo gihugu) kabona naho abagituye bashaka kurisobanura uko bishakiye (interpretation). Niyo mpamvu ritorwa. Mu by’ukuri kuritora ni nko kwemeza ko rihagarariye abanyagihugu bose!
4. Abatazi icyo rivuga cyangwa se badashaka kumenya ibyo rivuga nibo ahanini bisanga mu ruhande rw’abitwa “abigometse ku butegetsi“. (Kwigomeka ku butegetsi no kurwanya ubutegetsi ntabwo ari kimwe).
5. Riba risobanutse ku buryo bidateza kuvangavanga ibintu cg kudasobanukirwa neza (ambiguities / ambiguïtés).
6. Rijyana n’ubwenegihugu (Identité Nationale / National identity).

Hari n’ibindi biriranga ariko ibi nibyo bya ngombwa. Mfite impamvu aribyo mvuzeho cyane.

Muri Luka 17:21 hatubwira ko ubwami bw’ijuru buri kumwe na twe. Ni ukuvuga ngo hariho ikindi gihugu cy’ijuru nk’uko abizera tubizi. Mu mitekerereze yanjye, numva niba kiriho kigomba kugira ibikiranga n’imyitwarire y’abagituye cyangwase se abifuza kugitura nk’uko iyo uvuye mu Rwanda ukaza kuba muri Canada haba hari imyitwarire Leta y’aho ugiye (Canada) iba ikwifuzaho. Igihugu cyo mu ijuru ntabwo gifite reta ikorera hano mu isi ariko, itegekonshinga rikigenda ritubwira ko abatuye muri ino si (jye nawe) bashobora kugitura, ariko hari ibisabwa. Ibyo byose birasobanuye muri iryo tegekonshinga. Abenshi mubashaka gutura icyo gihugu (Abakristo cyane cyane) bajya bantangaza. Muti kuki? Kubera ko badashaka kuvuga kuri iryo tegekonshinga rivuga ibyo mu gihugu bashaka kubaho, cyangwa se bagashaka kubivugana n’abo “bumva ibintu kimwe“, cyangwa se mu yandi magambo n’abo bahuje irari! Abandi bo ntibashaka no kuryumva (iryo tegekonshinga). Ni nko kumbwira ngo urashaka kuba umunyarwanda no kuba mu Rwanda cyangwa se gukora na Leta y’u Rwanda wenda uba hanze y’igihugu, ariko ntushake kumva uko Leta y’u Rwanda ikora! Ikibazo rero mfite ni iki : KUKI ABAKRISTO BATINYA KUGANIRA KURI BIBILIYA (Itegekonshinga ryo mu gihugu babamo)?

Impamvu zishoboka ni nyinshi, kandi ingaruka nazo zizaba nyinshi. Impamvu nyamukuru ariko ni iyo kubanza kwemera iryo tegekonshinga. Ryandikwa sinari mpari nk’uko irya Canada cyangwa se iry’u Rwanda nabwo ntari mpari, ariko rirandeba nabishaka ntabishaka. Kandi nawe usoma ni kimwe…

Muri za ngingo zo haruguru reka turebe iby’itegekonshinga ryo mu ijuru

1. Rireba abantu bose rititaye kucyo umwe aryita.
   Niba ari itegeko rireba abajya mu ijuru, nkaba mvuga ko ariho njya, rirandeba, nawe kandi, rititaye ko tubyemera cyangwa tukabyanga. Muri make ntirihinduka kuko nintarifata nk’ukuri, uwundi azarifata uko riri, kandi naho yaba umwe gusa ukuri kuguma ari ukuri! N’abataryizera rirabareba.
   
2. Riranditse!
   Naje mu isi ndisanga, kandi nzayirisigamo (Yesu nazaba ataraza) .
3. Rifite ukuri kumwe: Abajya mu ijuru barangwa n’urukundo kuko Imana ari Urukundo, kandi nk’uko Yesu yivugiye ati “nta tegeko risumba iry’urukundo” (Mariko 12:30-31). Aha nabonye abantu benshi bahatinda bakagerageza no gusobanura cyane, kandi birasobanutse!
   Rifite ukuri kumwe, naho mu isi habamo amadini miliyari zingahe buri wese mu isi afite irye, byanze bikunze habonekamo abo byayobeye kubera ukuri ni kumwe kandi ntiguhindurwa n’uko tugusobanuye. Cyane cyane iyo dushaka kunezeza kamere zacu no kugundira imihango yacu y’idini! Yesu yaravuze ngo “Nijye nzira n’Ukuri n’Ubugingo”! (Yohana 14:4-6). Yongeye ati “Ntawe ujya kwa Data ntamujyanye”. Naho wateka ibuye rigashya, nta Yesu, ni uburenganzira bwawe kugerageza ariko…well,.. ntaho uzagera kuko mu ijuru si mu isoko.
   
4. Abadashaka kuribona uko riri ni abigometse ku butegetsi bwo mu ijuru.
   Ndabizi ko aya ari amagambo aremereye, ariko nk’uko nabivuze haruguru ibi simbivuga kuko nageze ahadaterwa amabuye, ariko mbivuga kuko nanjye birandeba. Niba mpisemo kugenda binyuranyije n’iryo tegekonshinga ryanditswe, byangira iwogometse ku butegetsi. Abigometse rero bo barahari kandi ni benshi cyane. Badashaka no kumva iby’iryo juru, cyangwa se bashaka kujyayo nk’uko bajya mu bikari byabo, ariko bakirengagiza ko nabyo bifite amabwiriza. Iyo bitaba ibyo Yesu yari gufungura amarembo buri wese akinjira!
   
5. Rirasonutse bihagije.
   Muri Yesaya we haratubwira ngo iyo nzira izaba iyo kwera no gukiranuka. Ndetse n’abaswa ntibazayiyoba. (Yesaya 35: 1+). Jye impamvu mvuga ngo rirasobanutse ndebera kuri Yesu. Ibintu yitayeho cyane (umutima uca bugufi nk’uw’Umwana, Urukundo rutaryarya,…) nibyo binyereka ko ubwami bw’Imana atari ibintu “bihambaye cyaneeeee” nk’uko abagendera mu kidini bakunze kutwereka. Niba usoma bibiliya uzatangazwa n’uko Yesu yagaragara nk’uwibasira abafarisayo n’abanditsi (abanyedini). Kubera iki? Kubera ko bitaga ku bintu bidafite aho bihuriye n’ubwami bw’ijuru. Ahubwo bakibagirwa ibikwiriye (imitima), kuko ubwami bw’Imana butangirira mu mutima w’umuntu ntabwo butangirira mubyo umuntu akora cyangwa yirirwa aririmba kuko benshi bakora ibyo batanizera kubera inyungu zinyuranye cyangwa izindi mpamvu (influences).
   
6. Identité National/ National identity (ubwenegihugu).
   Abanyarwanda bafite ibibaranga. Abarundi nabo ni uko, n’abandi bose. Muri ibyo harimo nk’umuco, ururimi, amateka n’ibindi. Ibyo byose hamwe nibyo “Ubwenegihugu”/Identité Nationale/ National identity). Niyo mpamvu igihugu cyabuze bimwe muri ibyo kiba gifite ibibazo.
   Noneho rero…Abantu bajya mu ijuru (cyangwa batangiye kuribamo hano mu isi – ibizera by’ukuri) bafite ibibaranga bahuriyeho kabone n’aho baba basengera mu madini atandukanye! Bagira imvugo yabo, bagira amateka yabo, ingeso, imyitwarire,… ariko ikiruta byose, bubaha itegekonshinga ry’igihugu cyabo!
   

Niyihe mpamvu rero nanditse ibi byose? Nabyanditse kugirango nkangurire mwe mwese mukunda Imana, mwese musenga mwaba musengera muri gahunda cyangwa se musenga uko mubyumva, mwe mwese mwiyita abakristo (ababaho nka Kristo cg abizeye Kristo), ngo mutangire mufate ijambo ry’Imana nk’amata y’abashyitsi. Niryo rituranga, niryo rituyobora, niryo ridukomeza, niryo rihishe amabanga yose aranga ubwami tumaranira. Yaba ayo tuzi n’ayo tutazi!

Mu cyumweru gishize rero nahisemo gutangira gushyira icyo gitabo mu Kinyarwanda muri format electronique ku buryo abatakizi bashobora kugisoma kuri Internet cyangwa se bakaba banagishyira kuri computer zabo (Ibi bizashoboka kucyandika birangiye kuko ngenda nandika igice ku gice). Muri urwo rwego rero, natangiye indi blog hano kuri ishimwe.com igenewe aho gatabo. Ubaye ufite ibitekerezo cyangwa se ibindi byifuzo kuri ako gatabo n’imyandikire yako cyangwa se ukaba wifuza gufasha mu kugashyira mu kinyarwanda muri format electronique wabimenyesha unyandikiye kuri profile yanjye.

INJIRA MURI BLOG Y’AGATABO K’UMUGENZI

Aba baclandestins babaho kuko ibihugu uko biri kose nta buryo bwuzuye ijana ku ijana bifite byo kumenya uwinjiye wese n’uwasohotse wese nta mbebya. Yewe na Leta zunze ubumwe z’Amerika ntizishobora gukurikirana buri muntu wese winjiye! Ariko mu bwami bw’Imana siko bimeze.

Ushobora kuba warumvise imvugo igira iti “inzira zose zigera i Roma”. Ikibabaje ni uko hariho n’abantiu bizera Imana bagashaka kuzana iyo mivugire yo kuvuga ngo “inzira zose zigera ku Mana”. Ni agahinda, kuko ijambo ry’Imana ritubwira ko ubwo yesu yaganiraga n’abigishwa be igihe kimwe, Toma yaramubajije ati “Mwami ko tutazi aho ujya, inzira twayimenya dute”? Yesu aramusubiza ari ” Ni je nzira n’ukuri n’ubugingo. Ntawe ujya kwa Data ntamujyanye“. (Yohana 14:6) Aya ntabwo ari amagambo Janvier nanditse, ahubwo ni ijambo ry’Imana ribivuga. Nemeza ko iyo haza kubaho inzira nyinshi, Yesu yashoboraga kubabwira ati “nimugende mukore ibyo mushaka byose muzagera kwa Data“. Ariko siko yabivuze. Mu yandi magambo yabakuriye inzira ku murima arababwira ati “Kwa Data nta baclandestins bahaba. Utanyuzeho ngo afate Visa ntibazamwakira”! Reka turebe urugero rworoshye.

Muri Yohani 3 tubwirwa ibya Nikodemu. Yari umunyamategeko w’umufarisayo, akaba umutware mu bayuda. Kubera wenda ko yari yarasomye Torah(Bibiliya ya Kiyahudi) cyane, wenda yumvaga ko azi Imana bihagije. Ariko Yesu aramubwira ati “Ni ukuri ni ukuri, ndakubwira yuko umuntu utabyawe ubwa kabiri, atabasha kubona ubwami bw’Imana. ” Mbese, visa yo kwinjira mu bwami bw’Imana ni ukuvuka bwa kabiri nta kindi. Namaze igihe kinini ndwana no gusobanukirwa icyo ijambo “kuvuka ubwa kabiri” rivuga. Nabiterwaga n’uko nabonaga amadini menshi, nkumva inyigisho nyinshi zinyuranye kandi nkabona bose bakoresha Bibiliya mu kungezaho izo nkuru, n’ubwo zabaga zitandukanye mu buryo bugaragara. Aho niho ubwami bw’Imana butandukaniye n’amadini. Ubwami bw’Imana buhera mu mutima w’umuntu, iyo umaze kwemera Yesu nk’Umwami wawe. NTABWO KUVUKA UBWA KABIRI ARI UGUHINDURA IDINI CYNGWA KUGANA IRINDI NI DINI. NI UGUHINDURA IMIBEREHO, UGATANGIRA GUKURIKIZA IYO MU BWAMI BW’IMANA.

Ibi ni ibintu naho byaba wiherereye ubwawe, bigaragara mu mucyo, kuko mu bwami bw’Imana nta baclandestins barimo. Iyo umaze kubona ibya ngombwa byo kurijyamo, naho byagenda gute ugaragarira bose cyane cyane ingeso nziza z’urukundo atari imihango itegetswe n’idini.

Mu kurangiza ndashimangira ko iby’Imana bibera mu mucyo. Nta kwihisha no guhishira. Abanyamadini benshi usanga bagenda bapfundikiranya ibintu, bimwe bakabisobanura uko bashatse bitewe n’inyungu runaka. Ukuri ni Yesu. Ubugingo ni Yesu n’inzira ni Yesu. Nabyemera ntabyemera ntibihindura ukuri. Nabishobora cyangwa byananira ntibihinduka, kuko mu bwami bw’Imana nta batagira ibya ngombwa babaho. Nta baclandestins! Wowe se waba ufite ibya ngombwa cyangwa ibyo wahoranye byaratakaye?!!

Nk’urugero rworoshye ni ukuntu abantu bakunze kuvuga ngo “Bibiliya ni igitabo nk’ibindi” ndetse ngo cyansitswe n’abantu. N’ubwo iyo mvugo ariyo bitewe n’uko ubirebye. Nibyo koko Bibiliya yandikirwa mu macapiro nk’ibindi bitabo, ikoresha impapuro nk’izibindi bitabo, ariko mu by’ukuri igitabo nyacyo ni ibigikubiyemo n’icyo bigeza ku bagisoma. Nk’uko bitangazwa n’ikinyamakuru Times cyo mu bwongereza, Bibiliya igurisha byibura amakopi arenga miliyoni 100 buri mwaka ugereranije n’ibindi bitabo n’ubwo bwose yo itajya ishyirwa kuri list y’ibitabo byagurishijwe cyane (best selling) kubera ari igitabo cy’amahame y’imyizerere. Ibi byagombye kudutangaza cyane cyane ko turi mu bihe abantu Imana bayishyize ku ruhande.

Nko muri Leta zumwe ubumwe z’America zonyine, umwaka wa 2006 Umuryango wa Bibiliya wa Gedeons watanze bibiliya zirenga Miliyoni 56. No mu gihugu nk’ubushinwa kitrizera Imana ku mugaragaro, Bibiliya ni kimwe mu bigurishwa cyane. (http://www.time.com/time/world/article/0,8599,1695279,00.html )

Ibi bivuga iki?

Bivuga ko n’ubwo Bibiliya yanditse ku mpapuro zisanzwe, ifite ibiyirimo bikomeye cyangwa biryoshye bitaboneka mu bindi bitabo byba byarabayeho byose. Igitangaje kurusha ibindi ariko, ni uko icyo gitabo uko kirushaho kurwanywa bisa nk’aho ariho kirusha kugira imbaraga.

Ni uko rero niba utunze Bibiliya ni igihe cyo gutangira kuyisoma cyangwa se kuyegura ngo nawe wicukurire ubutunzi buyirimo. Mfite umwarimu nkunda wanyigishije mu mashuri yisumbuye wakundaga kumbwira ati “Bibiliya ni nk’inyanja. Icyo usomye uyu munsi ushobora kongera kugisoma ejo kandi kikaza gifite ubundi buryohe“. Ibyo byaba bisobanura impamvu ikunzwe muri 2009 nk’uko yari ikunzwe mu mwaka wa 300!

Niba ushobora gusoma ibi nandika ni uko wumva ikinyarwanda cyangwa ikirundi. Ni ukuvuga ko ibyabaye muri ibyo bihugu byombi ubizi, cyane cyane mu myaka nka 10-20 ishize. Ibihe birushya by’intambara n’amacakubiri adashira, ubwicanyi n’itsembatsemba n’ibindi. Mfite umusore w’umugenzi wanjye ukunda kumbwira ngo “umuntu akoze mu ibumba ryitwa kwibagirwa”. Akunze kubivuga nk’iyo twicaye turi kuganira ku buzima buriho, ariko cyane cyane ku kuntu abantu basigaye bitwara.

Ntabwo ndi inararibonye ariko ndibuka mu myaka mike ishize abantu hirya no hino tugoswe n’ibibazo n’impagarara zinyuranye. Twese twarasengaga ndetse n’utabizi yarabyigaga “ku ngufu”. Abenshi bahize imihigo ngo “Mana n’unkura aha, . . .nanjye nzakora ibi n’ibi”, ariko nk’uko umuririmbyi yabivuze, batindijwe no kugera hakurya (ya bya bibazo). Mu minsi ya none, ahantu hose ugeze usanga hari ibibazo binyuranye ariko ikimbabaza kandi kikamerera nabi cyane ni uko usanga ibibazo bikabije cyane “mu bantu b’Imana”. Abagombye kuba ibisubizo by’abo mu isi nibo usanga aribo bari kuba ibigusha. Bibiliya iravuga ngo “muri umunyu w’isi”. Ariko ikibabaje ni uko bisa nk’aho wa munyu umaze gukayuka, kandi icyo gihe ngo ntacyo uba ukimaze kereka kujugunywa abantu bakawukandagirira hasi. Mu minsi ya none, usigaye usanga mu matorero anyuranye ariho hari imiborogo, amatiku, kwicamo ibice, kumererana nabi no kwishyiraho, ndetse nihataba gutabarwa kw’ijuru n’ubwicanyi wenda buzaza, kuko numbise ko hari n’abarwanye. Ikibazo mfite ni iki : Abantu twabaye iki? Kuki twibagirwa vuba?

Sinzi niba ari jye jyenyine naba nisangije ako gahinda cyangwa se nkaba narasaze wenda (nabyo birashoboka) ariko sinumva ukuntu umuntu amara kuva mu makuba nk’ayo abanyarwanda n’abarundi twanyuzemo, yarangiza akongera agashaka kwigira akari aha kajyahe. Nihagire unsobanurira…

Hari indirimbo twajyaga turirimba muri chorale ivuga ngo

Kuki wibagiwe Yesu, ntumenyeko yagupfiriye,
umunsi azaza uzahungira he, ko azaza nk’umujura n’ijoro?

Bamwe baramwibagiwe, bibera mu bibanezeza
abandi baracyamwibuka, nibo azagaruka kujyana iwe

Aya magambo ni amagambo akomeye kuko asobanura impamvu ibibazo byinshi bikomeje kuza byisukiranya cyane cyane ku bantu bitirirwa izina ry’Imana. Munyumve neza, aha nta dini runaka mvuze kuko ubutumva nakiriye nta madini yari arimo kandi nemeza ko aribwo butumwa buzima kuko na Yesu ava mu isi nta dini yasize. Aha ariko na none, ntibivuga ko tugomba kwemera ibije byose kuko ijambo ry’Imana ritubwira ngo tugenzure!

Nsigaye numva induru ziri hirya no hino nkumva mbuze uko nigira kuko binyereka ibintu bitatu bishoboka.

1. Abantu ntibazi ibyo barimo
   Ubundi uzanga umuntu utazi ibyo arimo ari umuntu utazi uwo ari we (kutimenya). Abantu batagira personalité bajyanwa n’umuyaga, mbese bajya iyo abandi bagiye. Bashobora kuba ari abagenzi(urungano), umuryango cyangwa se abakurushije imbaraga bandi. Iki ni ikibazo kuko iyo utazi uwo uriwe, ukora ibintu nabi. Nanjye ubwanjye hari igihe nanyuze mu bibazo ntangira guhuzagurika ariko Imana ishimwe ko igihe gikikwiye itugarura ikatwibutsa abo turibo n’ibyo yaduhamagariye gukora!
2. Abantu bari mu bintu kubera inyungu zabo
   Aba bo ni ibindi bindi, barusha ubumara incira kuko bazoreka benshi ariko nabo batiretse. Hariho rwose abantu basanga batagira success isanzwe mu isi bagahitamo kwitwikira izina ry’Imana ngo bagere ku nshingano zabo. Ntabwo mbatindaho, kuko batihannye vuba no kurimbuka birabugarije. Ariko nabibutsa ikintu kimwe gusa, ni uko Imana itanegurizwa izuru.
3. Imana ishobora kubyemera
   Birashoboka ko Imana yemera ko umuntu runaka ageragezwa cyangwa se itsinda runaka ry’abantu rinyura mu bintu kugirango yo yiheshe icyubahiro. Yobu muri Bibiliya ni urugero rwa hafi. Intumwa gato nyuma ya Yesu narwo ni urundi rugero. N’ubwo bwose ariko Imana ishobora kwemera ibintu nk’ibyo bibaho, aho bigeze ndagenda mbona ko n’Imana akenshi irengana kubera abantu twuzuye amafuti ugasanga byose tubuze uko tubyikiza, tukabyita “ubushake bw’Imana”. Aho murambabarira, ubushake bw’Imana bwatuma imitima y’abantu yangirika buranshaririye kandi ntibuzanyorohera kubwemera.

Nanditse ino nkuru kugira ngo wenda uri bubashe kuyisoma yongere agire gutekereza gato kubera ko ibiri kuba hirya no hino birerekana ko abantu bamaze kwibagirwa. Si ukwibagirwa gusa ariko, abantu bamaze no kunezerwa “kudatekereza ingaruka”. Iyabaga twibukaga amarira twaririga igihe amasasu n’amabombes byagwaga, ntitwakomeza kwigira ibikomerezwa. Iyabaga twibukaga aho Imana yadukuye, bamwe bagataha mu mahoro abandi nabo ikabarindira mu buhungiro, ntitwakoje gukora ibitandukanye n’ibyo Imana yaduhamagariye gukora. Iyabaga twibukaga ko turi inyama n’amaraso kandi umwuka duhumeka ufite nyirawo kandi ushobora kuwisubiza igihe ashakiye, ntitwagombye kwigira abahanga ba cyane, abatunzi cyangwa se abakomeye ukundi!

Imana idufashe kwibuka no gusubira ku rufatiro.